كباريه ....

بإعتراف قلبي الملعبك واعتراف حالنا المشبك
باعتراف جوعنا اللي يربك واللي حولني لسجين
باعتراف أهلي وناسي واعتراف موتة حماسي
وباعتراف اللي يواسي واللي خلاني حزين
باعتراف صرخة آهاتي واعتراف ضحكة مماتي
واعترافك يا حياتي لما سبتيني فأنين
باعتراف أهل الثقافة وكل صناع الهيافة
خدها مني وبلطافة

مصر دي يعني الجنون
مصر دي يعني التناقض يعني مين انت وفين
كام وإمتي وإيه وليه قوللي مين جاب الجونين
مصر يعني قانون طوارئ يعني تتعلق مشانئ
يعني لو صوتك يسمع تبقي قرد في ثانيتين
مصر يعني كلام مفبرك يعني تظلم فيك تفرتك
يعني تركع يعني تخضع يعني هتذلك سنين
مصر يعني فول وترمس ياللا أزأز ياللا مزمز
وانسي ريحة اللحمة واوعي يبقي نفسك في رغيفين
مصر ست الكل شايفة وعارفة ان ساعتها واقفة
يعني تطلع يعني تنزل همة نفس النقطتين
مصر آآآآآآآآآآآآآآآآه....مصر إيييييييييييييييييه
مصر دي كباريه بيكبر

بكرة يولع باللي فيه
.......................................................