06‏/08‏/2008

الكباريه قفل........



نمت شوية الضهر في يوم
نمت شوية الضهر في يوم
لقيتني صحيت مفزوع م النوم
لقيتني بكلم حتة بنت قمر..صاروخ..
خلتني أفز... أقوم
هوصفها ...يبقي قلة أدب
هنجزها...تبقي سحر انكتب
فجأة..لقيتها بتيجي علية وبتقوللي بكل لطافة ورقة وذوق
بقي ينفع أبقي ف يوم كباريه يا قليل الذوق
كباريه ..
أفهم من كدة ان حضرتك تبقي مصر..؟؟
قالتلي آه مصر ..
مصر ياقليل الأصل
ده أنا مصر الأصل ..الفرع ..
مصر الدين والشرع
أنا مصر الطيبة ..
وساعة الجد الطول والهيبة
مصر السمرة ..
مصر الروح الطاهرة الحرة
مصر الخير ..مصر دليل .
.واللي يخالفه هيطلع برة
مصر اللمة وطعم الصحبة ..
مصر اجابة تحل مسائل سهلة وصعبة
مصر الليل ..مصر النيل ..
ولا مصيبة يا واد لتكون ممشتش عليه
بكرة هتمشي وتمشي لما هتعرف معني الحب ده ايه
أما مارينا وعز ودينا ..
فليهم نبي مش هوة نبينا
وليهم بكرة ..وآه علي فكرة
بكرة قريب ناوي يجينا
واسمع مني ..اسمع يابني
أنا ممكن أرَجَّع تاني جدودك م الصبح
لكن أنا بديكم فرصة ..وآآآآآآآآآآآآآآآآآآآآآآآآآخر فرصة تكونو الصح
آخر فرصة تكونو الصح

..........................


طبعاً الكلام ده رد علي الموضوع اللي قبله "كباريه "

للناس اللي مقرتش البوست اللي فات

أما الناس اللي بتشرفني دايماً فبشكرهم جدا جدا

ومستنيين نقفل الكباريه مع بعض

فرصة كبيرة ف رمضان ان شاء الله ...

ياللا شدو حيلكو وادعولي محتاج دعواتكم جدا جدا