الفُرقة

 حياتنا مع بعض

لخبطة و جنان ف جنان 

ف الاول .. يا صباح الخير .. ببردو بترد 

صباح النور 

هنخرج ليه و هنعمل ايه .. يوم مش مفهوم .. 

العربية تدور .. و أغاني الفُرقة المالية حياتنا وياها تدور .. 

ولأن عياري بيدوش .. لو ميصيبش ..

 قولتلها ياست الحسن انا ازاي .. ابقي صعيدي وعاشق و نصيبك عشقي .. وانا عشقي يفيض لبحور و بلاد .. و تردي تقولي انا حُسني زاد .. 

ازاي يا ست البنات المح عيون الناس بتبص .. و النار جوايا قسماني النص .. 

تنفخ .. و بعيد عن عيني تبص .. 

ف العربية تدور .. و اغاني الفُرقة المالية حياتنا .. وياها تدور 

نشبك ايادينا ف بعض .. ولأن الرغبة .. رغبتنا ف بعض .. رافضة المفروض .. نمسكها بقوة .. 

ولأن الحكمة اللي تقول نتفارق .. ماتت بالقوة  .. 

كملنا الغنوة 

و لحد ما فوقنا  .. ونزلنا نسلم ع الشمس ف لحظة موتها ..  ودعنا قلوبنا 

ولأني عنيد كسرت الحيط .. هديت البيت .. ف سكوتنا حكيت .. 

وبدأنا نغير ملامحنا بمرور الوقت .. نسمع ف اغاني الناس العاشقة و الناس الماسكة .. لكن و كأن الصوت بيقطع .. و الغنوة تقول " و قابلتك انت .. لقيتك " ف نقول هنلين .. و ايدينا بقت تتمد ل بعض .. و تدور علي حاجة توصلنا لأقرب ارض .. ف الغنوة التانية وياها تزق .. ف تقول " اللي شوفته قبل ما تشوفك عنيا " ف عنيا تبص .. و فلحظة تاخدني بعيد و انا بجري .. الغنوة التالته تزق .. و الست تقول " صحوا نار الشوق ف قلبي .. و ف عيوني " .. ولان اليوم مجنون .. المشهد يطلب تغيير بمرور الوقت .. 

ف تدور العربية .. و اغاني الفُرقة المالية حياتنا وياها تدور .. 

و نقول و بعلو الصوت " النسيان " 

ف يصوت قلبي ف وشي و يقوللي ازااااااي .. ف يرد غبائي " هتشوف دلوقت .. 

قولتلها يابنت الناس  نتفارق .. انا مش كارهك ولا ناكرك .. ولا زاهدك .. لكني بعندك ليا هعاندك .. 

ردت بهدوئها اللي يخوف .. قصدك نتفارق .. نتباعد .. و انساك و اتواعد .. و يمر الوقت بدونك .. 

ف تدور العربية وعتابنا وياها يدور 

و عملت .. و عملتي .. كسرت .. و كسرتي .. 

وبقيتا اتنين عاوزين يبعدوا عن بعض اتين نازلين تقطيع ف الورد .. اتنين مجانين و تالتهم مَرَدَه و شياطين .. و امل بيطير .. و لقا و احلام عمالة تتهد .. 

و الشيشة ودخانها  بيداروا الوعد ..

ولأنك دم .. و هوا .. و الم .. 

ولانك عشق .. غرام .. و نَهَم .. 

ولانك روح .. ب تداوي جروح .. 

ولانك حلم .. ف حياتي اهم .. 

حسيت بالهم 

دارت عربيتي .. و اغاني الفُرقة المالية حياتنا مش راضية تدور .. 

بحبك