مش تقول ..مش تقول يا حبيبي انك إسرائيلي
مش تقول وبعلو صوتك خد يا مصري وتناديلي
آجي جري عليك وأبوسك ...ما احنا واحد
خدت غازي أخدت خُوخَك
خدت حَقِي فوق حقوقك
كسر حُقي ..أيوة حقك ما انت مش عارف غلوتك ....
أصلك انت إسرائيلي
............................
لينا جار .. لأ .. دول جارين
واحتمال يبقوا أربعين
عندهم فاطمة وحسين
واللي جاي في السكة هيسموه أمين
خاللوا اسم البت جولدا
وخاللوا اسم الواد شارون
المهم ان انت ترضي
واللي جاي هيكون شيمون
ما انت مش عارف غلوتك ...
أصلك انت إسرائيلي
.............................
تشرب ايه ...طب لأة ليه ؟؟؟
ده حتي كل حاجة عندي دلوقتي اسرائيلي
ودول بس شوية مياه "بعد إذنك " من نهر نيلي
قصدي نيلك ...نهر نيلك
جاتنا نيلة وجاتنا نيلك
طب ايه اللي جابنا عند نيلك !!!؟؟؟
آآآآآآآآآآآآآآه ... مش تقوللي
يعني احنا أصلا كلنا من تل أبيب
مش بقوللك انت مش عارف غلوتك ...
أهو كلنا طلعنا اسرائيلي
..............................
ليلة حمرا ...هية شكلها كدة ليلة حمرا
فيها بانجو وفيها خمرا
وكلها بردو اسرائيلي
وكام بت روسي في الاصل اسرائيلي
وكام بت مصري ماركتها بردو اسرائيلي
ولسة مش عارف غلوتك ...
قوم ياراجل ده احنا أهلك
روح وعيش برطع براحتك
أصلك انت
أصلك انت
أصلك انت اسرائيلي
.............................................................................
نعتذر لأخواننا وأخواتنا وأمهاتنا وبناتنا في غزة
كلنا ..كلنا بقينا اسرائيلي
بخصوص الصورة ...وزير خارجية مصر وليفني وزيرة خارجية اسرائيل
ماسكة ايد بصراحة ولا أجمل
......................
هناك ٣٠ تعليقًا:
لا تعليق
بوست رائع بجد
ومعبر اوي
فعلا واسفاه ع العرب
مش عارفه اقول ايه
بس اللي بيحصل دلوقت ف غزه
مجزره مش ليها كلام تاني
اتمنالك التوفيق
دايما ايام الامتحانات كدا
ادخل عندك الاقي الكابه كلها
دعواتك
هكذا....
اولا :تمنياتى بعام سعيد علينا جميعا رغم بدايته الحزينة
اول مرة قرأتها كان احساسى بيها اننا بجد بقينا عادى وكأن مابيننا وبينهم أصبح ذكرى من أرشيف التاريخ القديم
وتذكرت لما زرت طابا وكان فيه تحديد اقامة لنا كطلبة مصريين ومحظور علينا دخول اماكن محددة وفى الوقت نفسه رأيت فى أعين السائحين الاجانب نظرة لنا فحواها"انتوا جايين هنا ليه" وكأنها بقت بلدهم هما
ودلؤتى ومع الصورة تحديدا دمى اتحرق وقلبى اتوجع
ولانملك سوى حسبى الله ونعم الوكيل
ربنا يهنيهم ببعض :)
اللهم أنصر المسلمين فى كل مكان
تحياتى لك
السلام عليكم
كل عام وانت بكل الخير
وعام سعيد وموفق ان شاء الرحمن.
"لنـا الله"
خالص تقديرى ........
السلام عليكم
ازيك يا دكتور
اكيد عارف رأيى فى البوست
دامت كلماتك المعبره و الهادفه دوما
و ندعوا الرحمن ان يكون فى عون اهل غزه و ان يعينهم و ينصرهم
اكيد مهما حاولنا ان نجد كلمات تعبر عن احوالنا و الامنا فلن نجد لنا و لهم الله ..
سلمت يداك
و دمت قى حفظ الله و رعايته
خالص تقديرى و تحياتى
اللهم انصر الأسلام والمسلمين وعلوا بكلمة الحق "لا إله إلا الله محمد رسول الله "
انا خلصت اجازه ورجعت وطبعا كان لازم اجى اعلق رغم انى قريت البوست اول مانزلته
بجد جميل جدا انك عبرت كده رغم سخريته بس اقرب للواقع من اى كلام تانى ممكن يتقال
يارب تكون بخير وربنا معاك ان شاء الله
السلام عليكم ورحمة الله
قصيدة رااااائعة جدا يا دكتور احمد
وتليق فعلا على الوضع اللي احنا فيه ربنا يفرج عن اخواننا ويكون لهم عونا ونصيرا ويكفينا شر كل خاين لدينه وأمته
فى الصميم ياطبيب
مش بس فى الصميم
ده فى القلب
عدل!!
ربنا يرحمنا
يادكتور غنيم ويسامحنا
عارف الموقف دا بيفكرنى بايه بفاتن حمامه الله يمسيها بالخير لما رميت الاكلسير قصاد احمد رمزى ....نظام اغريه يا سكيننه ...حركات ستات قرعه زى نظام اى رجلى رجلى ...والرجاله بغبائهم يقعوا على طول فى الفخ
لو كان سابها تندب على وشها مكانتش غزه انضربت بس هو اظهرلها رقه قلبه وحبه ليها فساقت الدلال
حقول ايه اصل بصراحه الموقف ميتحكيش فيه غير سخريه من حالنا ومن الصوره
ايه الحكايه يا دكتور
فين الجديد ؟؟
منتظرين البوست القادم
تحياتى
نهر الحب
اهلا بيكي ومنورة وبحييكي جدا جدا علي مجهودك المتميز علي البلوج بتاعك
ربنا يجعله في ميزان حسناتك
ويارب يكون البوست عجبك ودايما موفقة ان شاء الله وبنسعد بتشريفك جداااااا
تحياتي
بالتوفيق....................
zozo
اهلا بيكي أخبار الامتحانات ايه ..؟؟
يارب تكون خير وتجيبي تقدير زي الفل ان شاء الله
منورة وسعيد جدا بزيارتك والحمد لله ان البوست عجبك
اما العرب فدول اللي همة احنا يعني حكايتهم حكاية
انا اسف والله ع الكابة "بس هية مش كابة أوي يعني "انا خليتها تريقة المرة دي عشان ظروف الامتحانات
اما الكابة بجد فهي القادم ان شاء الله
ركزي انت بس ف الامتحانات وربنا يوفقك
تحياتي وخالص دعائي
بالتوفيق.......................
shaimaa samir
اهلا بيكي
ايون
هو كدة بالظبط
تحياتي
بالتوفيق......................
موناليزا
اهلا بيكي منورة ويارب عام سعيد عليكي وعلي المسلمين جميعا ان شاء الله
اما علاقتنا بيهم بقت أكتر من العادي
بقت كارثة واحنا بنقع ف الفخ ومش حاسين احنا بنعمل ايه للأسف
اليهود بيخططو دايما ع المدي البعيد واحنا مش بنبص الا تحت رجلينا وبس
البلد فعلا في أماكن كتير زي سينا كدة همة عارفين انها بتاعتهم ومتأكدين وبيتكتكو لكدة
اهم حاجة نفهم ونعرف عدونا
وحسبنا الله ونعم الوكيل
دايما نسعد بتشريفك
تحياتي
بالتوفيق......................
dr ibrahim
ربنا يباركلهم ياعم بس اللي يزعل الواحد انهم معزموناش علي الفرح
منور بجد وسعيد جدا بتشريفك ودايما في انتظارك ان شاء الله
ربنا يتقبل منك دعائك
آمين آمين آمين
تحياتي
بالتوفيق....................
عفراء
وعليكم السلام ورحمة الله وبركاته
عام سعيد عليكي وعلي المسلمين جميعا
آمين
اهلا بيكي منورة الدنيا كلها وسعيد جدا بتعليقك
فعلا مالنا رب ولا ولي ولا اله الاه
ربنا يغفر لنا ولا يؤاخذنا بما فعل السفهاء منا
تحياتي وخالص دعائي
بالتوفيق.......................
rovy
وعليكم السلام ورحمة الله وبركاته
اهلا بيكي وعام سعيد
انا بخير الحمد لله أشكر ليكي تشريفك ودوام سؤالك
اكيد طبعا عارف رأيك وسعيد جدا جدا بردك والحمد لله ان البوست عجبك
لا نملك لأهلنا في غزة وفي العراق وفي كل مكان لا نملك لهم الا الدعاء وربنا يغفر لنا تقصيرنا وانا لله وانا اليه راجعون
أشكرك جدا علي كلماتك ودايما في انتظارك
تحياتي وخالص تقديري
بالتوفيق....................
تمر حنة
اهلا بيكي وسعيد بتشريفك جدا
ربنا يارب يتقبل منك دعائك
آمين آمين آمين
دايما بتنورينا ونجد تعليقك
تحياتي وخالص دعائي
بالتوفيق...................
رحيل
حمدا لله علي السلامة
عودا حميدا ان شاء الله وأهلا بيكي في مدونتك التانية
سعيد بتشريفك ويارب تكوني في أحسن حال وتكون أجازة سعيدة وتعودي بعدها متألقة تاني ان شاء الله
الحمد لله ان البوست عجبك والسخرية مقصودة لأنه للأسف واقع مينفعش معاه الا السخرية
المهم انك بخير والحمد لله ان البوست عجبك
في انتظارك دايما ان شاء الله
تحياتي
بالتوفيق.....................
امل
عليكم السلام ورحمة الله
اهلا بيكي منورة والحمد لله ان القصيدة عجبتك
واقع مؤلم بالفعل وحالنا لا يخفي علي أحد ربنا يغفر لنا ويسامحنا ولا يؤاخذنا بما فعل السفهاء منا
ربنا يتقبل منك دعائك ويشكر ليكي تشريفك ويارب تكوني بخير
تحياتي
بالتوفيق......................
سومة
اهلا بيكي أخبارك ايه ؟؟؟
والله تعليق زي العسل وموتني م الضحك تسلم ايديكي فاهمة انت كل حاجة
حركات والله نص كم بس هوة أبو الغيط رقيق وقلبه مش بيستحمل
المهم انت أخبار امتحاناتك ايه ؟؟
بالتوفيق يارب ونسمع عنك كل خير
في انتظارك دايما وفي انتظار تعليقاتك المتميزة
تحياتي وخالص دعائي
بالتوفيق....................
norahaty
اهلا بيكي يا طبيبة ويا زميلة ويا صديقة
أخبارك ايه يارب تكوني بخير وفي أحسن حال ان شاء الله
أشكر ليكي تشريفك والحمد لله ان البوست عجبك سعيد جدا برأيك
ربنا يتقبل منك دعائك ويشكر ليكي تشريفك وفي انتظارك دايما ان شاء الله
تحياتي
بالتوفيق.......................
rovy
اهلا بيكي
سعيد جدا والله بسؤالك المهم انك تكوني بخير
الجديد في الطريق اليك ان شاء الله بس يارب يعجبك
كمان مرة أشكرك جدا والله علي اهتمامك
تحياتي
بالتوفيق......................
السلام عليكم
ازيك يا دكتور
أنا خرجت اهو من الصمت
أنا قريت البوست ده لما كنت حاطه لينك فى منتدى ويومها قعدت أضحك على براءة شيماء وتعليقها
لانى أنا برضه فكرت زيها بس قلت طب ما اروح واشوف الاول
عارف موضوع غزة ده كشفنا كعرب ومسلمين
وللأسف الاكتشافات مكنتش حلوة قوى
ولسه بيقولهم بالاحضان مش حضن واحد بصراحة
ايه أخبار النتيجة؟؟
تحياتى
gannah
طبيبتنا الفاضلة أهلا بيكي وأعتذر جداجداجدا لعدم ردي للنسيان مش أكتر
أنا قرأت تعليقك وضحكت جدا وفرحت جداجد ولكن مش عارف ليه مش رديت عليه بس هو فعلا النسيان
أنا بعناي من موضوع النسيان بقالي كام يوم ومش عارف ليه !!!!!!!
المهم أشكرك جدا علي سؤالك وحضرتك تعلمين جيدا تقديرنا واعتزازنا بشخصك الكريم ولا يمكن ولا ينفع ولا يجوز اننا نفكر نزعل منك :)
الحمد لله انك خرجتي من المود
موضوع شيماء ده أنا فعلا ضحكت عليه جدا ولم يخطر ببالي لحظة ان الموضوع ممكن يتفهم كدة خاااااالص ولو كنت تخيلت هذا لكنت غيرت العنوان فورا
اختياري للعناوين دوما أقصد منه شئ مش اختيار عنوان وخلاص
المهم بس ان الغرض يكون اتضح وميبقاش فيه سوء تفاهم
والمهم تكوني حضرتك متفقة معايا انها بقت أحضان وهيصة مش حضن واحد
عارفة حضرتك
فيه مصنع ف المحلة الكبري حاطط ف المدخل بتاعه نجمة داود لأنه من المصانع بتاعة اتفاقية الكويز وده اثبات منه للولاء التام والكامل
أظن مفيش مهزلة بعد كدة
أما أخيرا الأمتحانات
الحمد لله خلصت ومنتظر النتيجة أما pass أو failed
ربنا يستر دعواتك
أشكر ليكي مرورك الدائم وأرجو أني أكون وضحت سبب عدم ردي وسعيد جدا بسؤالك وتعليقك
تحياتي
بالتوفيق.....................
السلام عليكم ورحمة
الله تعالى وبركاته
وإن شاء الله
passed
passed
passed
وبأمتياز
كمان ياطبيب
ويازميل وياصديق
حمدلله على السلامة
norahaty
الله يسمع منك ياااااااارب وأبقي من أهل ال pass
آمين آمين آمين
أشكر ليكي سؤالك واهتمامك يا طبيبة وزميلة وصديقة دمتي بخير ودامت زياراتك
الله يسلمك يارب ويرزقك السكينة وراحة البال
تحياتي
بالتوفيق.....................
إرسال تعليق